O coordinador de márketing en Visual Trans, Lois Vázquez, impartirá o afterwork o próximo 20 de abril
REDACCIÓN
A sede do Círculo de Empresarios de Galicia (Vigo) acollerá o vindeiro 20 de abril unha nova sesión dos afterworks Marketing & Comunicación que organizan Markea e mailo Clúster da Comunicación de Galicia. O encargado de impartir a charla, baixo o título Como crear unha estratexia de márketing B2B orientada ás vendas será o coordinador de márketing en Visual Trans, Lois Vázquez, que explicará como poñer en marcha dita estratexia partindo de cero e as principais accións e métricas máis relevantes para garantir o éxito.
Os interesados en asistir deben formalizar o rexistro na web. Os socios do Clúster poderán participar de balde nesta sesión, ao igual que os socios de Markea ou do Círculo de Empresarios de Galicia. Doutra banda, a entrada para o resto dos asistentes terá un prezo de oito euros. O evento comezará ás 19:30 horas e haberá un pequeno aperitivo para os que asistan.
Vendas sostibles e humor como arma na xestión de crise, entre os temas dos afterworks
Os afterworks Marketing & Comunicación celébranse no Círculo de Empresarios de Galicia, en Vigo, dende o mes de febreiro. O primeiro en impartir unha sesión foi o CEO de 2bedigital, Pablo Borrás. Baixo o título Como vender de forma rendible e sostible por Internet, os asistentes puideron coñecer a segmentación e unha visión holística das ferramentas publicitarias, dous aspectos clave á hora de xestionar a rendibilidade e sostibilidade dos ecommerce.
Ademais, trala sesión impartida por Pablo Borrás, o Círculo de Empresarios de Galicia acolleu no pasado mes de marzo outra sesión, neste caso correu a cargo de Isaac González, creativo publicitario en Recados Carmen e socio e director de Marketing en ReiZentolo. Durante o relatoiro, González falou sobre o humor como arma de comunicación na xestión de crise.
