Os Premios Paraugas regresaron a Expourense co formato presencial para recoñecer a excelencia dos nosos profesionais da comunicación
REDACCIÓN
Ourense converteuse hoxe na capital da comunicación e do márketing de Galicia ao reunir en Expourense, de novo de forma presencial, a máis de 350 profesionais que asistiron tanto ao 9º Foro da Comunicación de Galicia como á entrega dos VI Premios Paraugas.
9º Foro da Comunicación
O Foro da Comunicación de Galicia, organizado por Expourense coa colaboración do Clúster da Comunicación de Galicia, celebrou hoxe (12 de novembro) a súa novena edición, que supuxo un novo éxito, tanto polo número e o prestixio dos 22 relatores como pola acollida recibida por parte dos asistentes, tanto dos que estiveron presencialmente en Expourense como dos que seguiron o evento vía online. Este Foro está xa consolidado como un punto de encontro de referencia para os profesionais galegos vencellados a estes sectores, xa que lles ofrece a oportunidade de compartir experiencias con grandes expertos do sector e con directivos de importantes empresas que marcan tendencia á hora de comunicar.
O obxectivo deste 9º Foro da Comunicación de Galicia foi poñer en valor a calidade e a innovación do traballo das empresas galegas nestes sectores, incluíndo tamén experiencias punteiras de empresas de fóra da nosa comunidade. O programa do foro tivo moi presentes cuestións de actualidade de grande importancia para os profesionais, como a problemática das fake news ou a relación cada vez máis estreita entre xornalismo e deseño.
Como cada ano, o Foro da Comunicación de Galicia acolleu unha mesa redonda sobre márketing dixital na que participaron axencias punteiras neste sector e que estivo centrada nas reflexións esenciais para potenciar o márketing de contidos. Moderada polo director de márketing de PuntoGal, Luis Antelo, contou coa participación do director de Márketing de Rei Zentolo e socio director de Elemental Chefs, Isaac González; o CEO do Grupo Raiz, Jose Manuel Regueiro; o coordinador do master en Comunicación en Medios Sociais e Creación de Contidos Dixitais da Universidade de Vigo, Xabier Martínez Rolán; e da experta en creación de contidos e coordinación de estratexia de márketing B2B en Bannister Global, Verónica Casas.
VI Premios Paraugas
O Clúster da Comunicación de Galicia entregou esta tarde no recinto feiral de Expourense os VI Premios da Comunicación e do Márketing de Galicia, Premios Paraugas, que se crearon en 2016 co obxectivo de recoñecer publicamente o bo facer das empresas e dos profesionais que traballan en toda a cadea de valor da comunicación dentro da nosa comunidade autónoma. Na edición deste ano entregáronse un total de 19 galardóns. O Premio Paraugas ao Mellor Congreso e o Premio Paraugas ao Mellor Incentivo de Empresa quedaron desertos por mor da pandemia.
No marco da convocatoria, establecéronse oito categorías de premios (con 21 subcategorías en total) ás que optaron preto de 250 candidaturas, cifra que pon de manifesto o crecente interese por un evento que, ano tras ano, se consolida como a gran festa galega da comunicación.
Relación de premiados
A continuación, detállanse as empresas e organizacións distinguidas no marco de cada unha das categorías:
Categoría Edición e Impresión (Premios HP Indigo)
Categoría Edición
Premio Paraugas ao Mellor Libro
- Ensamble Isaac. Tórculo Comunicación Gráfica
Premio Paraugas ao Mellor Traballo de Publicidade Comercial
- Catálogo 2021. Tórculo Comunicación Gráfica
Categoría Impresión
Premio Paraugas ao Mellor Traballo Comercial (libro, folleto ou catálogo) feito en Impresión Dixital
- El cuaderno alado. Gráficas Anduriña
Categoría Deseño (Premios GAIN)
Premio Paraugas ao Mellor Deseño Gráfico
- Identidade corporativa de Katarsis. Kindergarten
Premio Paraugas ao Mellor Deseño Industrial ou de Produto
- CAMBO Familia de luminarias de interior. Cenlitrosmetrocadrado/a-emotional light
Premio Paraugas ao Mellor Deseño Dixital
- EASD Antonio Faílde. 988 Deseño e Arquitectura
Categoría Creatividade (Premios Roi Scroll)
Premio Paraugas á Mellor Idea
- Restyling Acción Tatoo. Tony Le Brand – Hijos de Rivera (Estrella Galicia)
Premio Paraugas á Mellor Campaña
- Sabemos que sempre o levarás dentro. Unifersa (Clickfer)
Premio Paraugas á Mellor Produción (Craft)
- Una cerveza como Dios manda. Tony Le Brand – Hijos de Rivera (Abadía dos Monxes)
Categoría Márketing Dixital (Premios PuntoGal)
Premio Paraugas á Mellor Estratexia de Márketing Dixital
- #MisMotivosVueling. Torres y Carrera
Premio Paraugas á Mellor Campaña de Produto ou Servizo
- Estratexia de venda dixital & CRO para Adeslas. Bysidecar
Premio Paraugas ao Mellor Proxecto de Social Media
- Cabo de Peñas. Quattro idcp
Categoría Márketing (Premios Avante)
Premio Paraugas á Mellor Estratexia/Acción de ‘Branding’
- Las Estrellas del Camino. Hijos de Rivera (Aupa/Ymedia/Proximia)
Premio Paraugas á Mellor Estratexia/Acción de Produto/Servizo
- Campaña de lanzamento das infusións Wize Monkey. Cafés Candelas (Ma Agencia/Desoños/Zeltia Stadelmann)
Premio Paraugas á Mellor Acción de Promoción de Vendas
- Promoción 0’0 Emisiones. Hijos de Rivera (Grupo 76)
Categoría Comunicación (Premios Galicia Calidade)
Premio Paraugas á Mellor Estratexia de Comunicación Externa
- Km.C. Hijos de Rivera (Idea Creatividad/Proximia Havas)
Premio Paraugas á Mellor Estratexia de Comunicación Interna
- Plan de embajadores Bysidecar. Bysidecar
Premio Paraugas á Mellor Práctica na Comunicación da Responsabilidade Social Empresarial
- Colleita propia. Aceites Abril
Categoría Eventos (Premios tac! activando el recuerdo de tu marca)
Premio Paraugas ao Mellor Evento
- SON Estrella Galicia Posidonia: El Reencuentro. Hijos de Rivera (Costa)
Premio Paraugas ao Mellor Congreso
Deserto
Premio Paraugas ao Mellor Incentivo de Empresa
Deserto
Premios honoríficos
Xunto a isto, o acto, emitido en directo en streaming pola TVG, serviu para por en valor o traballo de diferentes empresas e persoas que destacan pola súa contribución ao ámbito da comunicación. Entre os homenaxeados estiveron Amalia Baltar, xornalista con ampla traxectoria en medios e na comunicación corporativa e firme defensora da profesión e do asociacionismo; Oriol Villar, director creativo, realizador e guionista recoñecido con máis de 200 galardóns nos principais festivais de publicidade; e Fernando Vega Olmos, cofundador de Anita&Vega e gañador de multitude de premios ao longo de catro décadas. Ademais, recibiu unha homenaxe póstuma Lis de Soto, finado en 2014, fundador de Imaxe e todo un referente no eido galego da publicidade. Tras finalizar os seus estudos universitarios adicouse ás súas dúas grandes paixóns: ao mundo do deporte e ao da comunicación.
Entidades organizadoras
Esta edición dos Premios Paraugas da Comunicación e do Márketing de Galicia, organizados polo Clúster da Comunicación de Galicia, contan co patrocinio das seguintes entidades e empresas: HP Índigo, GAIN (organismo dependente da Consellería de Economía da Xunta de Galicia), PuntoGal, tac! activando el recuerdo de tu marca, Avante, Galicia Calidade, Inorde e Roi Scroll.
Ademais, este ano colaboran no evento Expourense, Miraveo, Aceites Abril, Atelier Gráfica Visual, a D. O. Valdeorras, Executivas de Galicia, Creatividade Galega, Dircom Galicia, Markea, OPC Galicia, Tórculo, Wise, Palacio de Oriente e tamén o Igape.
Ao acto asistiu un nutrido grupo de profesionais de toda Galicia, máis de 250 en total, entre os que se atoparon directivos de márketing e comunicación de destacadas empresas, así como de axencias de publicidade, deseñadores, editores, e outros expertos, que contribúen co seu traballo a fomentar a competitividade galega no eido da comunicación.
