A instalación Yule, que pode visitarse ata o vindeiro 6 de xaneiro, está asinada polo deseñador coruñés David Carballal
REDACCIÓN
As familias teñen unha cita na Cidade da Cultura de Santiago de Compostela nestas datas para descubrir a instalación Yule, un Nadal viquingo no Gaiás, que coa exposición Unha vida viquinga como pano de fondo, transporta ao visitante ao mundo nórdico e ás súas tradicións e símbolos do solsticio de inverno, ao tempo que acolle ao longo destas festas sesións de contacontos e obradoiros creativos para a rapazada.
A instalación, que pode visitarse ata o vindeiro 6 de xaneiro, está asinada polo deseñador coruñés David Carballal, autor tamén da gráfica e da publicación da exposición Unha vida viquinga. Moitos dos elementos da decoración están fabricados dun xeito sostible, reutilizando papel para recrear a neve que cobre os camiños, cartón nos tellados das cabanas que poboan o espazo, e apostando tamén porque sexan doados de volver empregar ou reciclar dun xeito sostible.
O percorrido arrinca cun barco viquingo que chegou a porto -convertido nun divertido photocall– e cun camiño de fachos que conducen ata a fogueira do lar, onde arde o tizón que debe manter vivo o lume toda a noite para escorrentar os malos espíritos. Non falta tampouco no espazo unha gran cabuxa de Yule, figura mítica que chega aos nosos días como un dos principais símbolos do Nadal escandinavo: as cabras de palla que decoran cada ano as casas nórdicas, en lembranza desta figura simbólica que achega agasallos para a rapazada e que podería ter as súas raíces nas dúas cabras mitolóxicas que tiraban da carruaxe voadora do deus Thor.
O acceso a estas actividades na Cidade da Cultura é libre e de balde ata completar aforo
Obradoiros e contacontos
Na instalación non falta un espazo dedicado a gozar de obradoiros creativos en familia nos que deseñar desde pezas de xoiería viquinga como colares de doas, ou experimentar coa pintura corporal a través de tatuaxes temporais de runas ou símbolos viquingos. Tamén a carón da grande árbore de madeira do Gaiás, celebraranse sesións de contacontos para compartir relatos e tempo cos pequenos da casa nestes días de festa. O acceso a estas actividades é libre e de balde ata completar capacidade e na web da cidadedacultura.gal poden comprobarse datas e horarios.
Espectáculos
Xa en xaneiro, a Cidade da Cultura acollerá un concerto especial de Nadal da Gramola Gominola, unha das bandas actuais de música en galego máis queridas polo público infantil e que vén precisamente de lanzar novo disco. Composta por Paco Cerdeira (Pakolas), Paula Romero (De Vacas, banda de Guadi Galego), Anxelo de Xermar (Festicultores Troupe) e Rodrigo Muñoz (S4N7, Nebra, Wealman), a súa proposta desenfadada de rock & roll en galego para público miúdo pon a bailar a públicos de todas as idades.
Tamén volve ao Gaiás este ano a experiencia de realidade virtual do Galiverso de Nadal, da que gozarán especialmente os máis pequenos da casa, entrando virtualmente na casa do Apalpador para fisgar como vive esta figura do Nadal galego. A experiencia é gratuíta, previa reserva de praza en Ataquilla.com ou no despacho de billetes do Museo Centro Gaiás. O complexo do Gaiás queda ambientado no seu exterior ata o remate das festas cun deseño de luces visible desde diversos puntos da capital de Galicia.