A nova edición de Titiriberia celebrarase do 18 ao 23 de agosto e combinará espectáculos, formación e exposicións
REDACCIÓN
Rianxo converterase entre os días 18 e 23 de agosto nun dos puntos de encontro do teatro tradicional de monicreques coa celebración da undécima edición de Titiriberia. O festival reunirá compañías galegas, portuguesas e doutros territorios do Estado nunha programación que combina espectáculos, estreas, formación e actividades arredor da conservación deste patrimonio escénico.
A cita conta cunha achega de máis de 20.500 euros da Consellería de Cultura, Lingua e Xuventude, dentro da liña de apoio de 290.000 euros a 13 citas profesionais de artes escénicas en toda Galicia. Ademais, Titiriberia forma parte da campaña de verán ‘Para gustos, cultura’, que reúne 3.600 propostas culturais distribuídas en máis de 200 concellos galegos.
Dez estreas para reforzar a creación galega
Un dos principais atractivos desta undécima edición será a presenza de dez novos espectáculos impulsados por compañías galegas, un dato que evidencia o dinamismo creativo do sector dos monicreques na comunidade.
A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán. A proposta continuará coa estrea de Treco-lerias, de Trécola Producións, e A rosa de papel, adaptación ao teatro de monicreques do texto homónimo de Valle-Inclán realizada por Alakrán.
Seisdedos presentará as súas novas propostas Mamulengo galego e Cantar do ano, mentres que Babaluva dará a coñecer Retratos de verán, unha peza creada en coprodución co festival para as caixiñas Lambe-Lambe, un formato de pequeno tamaño pensado para un ou dous espectadores.
Pola súa banda, Os Monicreques de Kukas estrearán Divertimentum Musicum e Sós, o mar, o barco e máis nós, tamén para este formato de proximidade. O programa contará ademais coa estrea de Retrincos: Sabela e Peito de Lobo, da histórica formación Airiños, inspirada na obra de Castelao, así como unha nova edición das Varietés do Barriga Verde, espectáculo colectivo que cada ano reúne artistas participantes no festival.
Un encontro arredor do patrimonio dos monicreques
Xunto á destacada presenza galega, Titiriberia volverá reunir compañías procedentes de Portugal, Aragón, Euskadi, Cataluña, Andalucía e Castela e León, configurando unha programación que pon en diálogo distintas tradicións do teatro popular de monicreques.
Titiriberia reunirá en Rianxo unha trintena de actividades e dez estreas galegas
A actividade distribuirase por diferentes espazos de Rianxo e das súas parroquias, ampliando o alcance territorial do festival máis alá dos seus escenarios habituais. Así, ademais do Campo de Arriba e do Auditorio Municipal, a programación chegará tamén a Taragoña, Araño, Isorna, Leiro e á praia de Tanxil.
O cartel contará igualmente coa presenza de compañías históricas como Os Monicreques de Kukas, Viravolta, Tanxarina e Trécola, todas elas con máis de catro décadas de traxectoria. A presenza destas formacións contribúe a establecer un diálogo entre xeracións de profesionais e á transmisión dun patrimonio escénico de especial relevancia para Galicia.
Formación, memoria e intercambio profesional
Fiel ao seu carácter de encontro especializado, Titiriberia completa a programación escénica cun programa de actividades paralelas orientadas á formación, a divulgación e a conservación do patrimonio dos monicreques.
Nesta edición poderá visitarse a exposición Tanxarina, 40 anos de monicreques, dedicada á traxectoria da compañía, así como a mostra que Trécola instala nos escaparates do comercio local. Tamén se poderán coñecer as exposicións promovidas pola Asociación Morreu o Demo, centradas no patrimonio europeo da marioneta tradicional.
A Escola de Títeres Barriga Verde organizará ademais un curso de manipulación impartido polo mestre portugués José M. Valbom Gil, centrado no Teatro Dom Roberto, tradición lusa estreitamente emparentada co Barriga Verde galego.
O programa completarase con encontros profesionais, obradoiros, visitas guiadas, coloquios e palestras, que consolidan Titiriberia como un espazo de intercambio de coñecemento e reflexión sobre o presente e o futuro do teatro de monicreques.
