A cadea de panaderías Tahona lanza a campaña con motivo do Día das Letras Galegas
MARÍA EIMIL
Uxía, Brais, Breixo, Antón ou Breogán. ¿Algún destes é o teu nome? Se a resposta é si (ou ben o teu tamén ten orixe galega) estás de sorte. A cadea de panaderías Tahona estrea unha campaña moi especial con motivo do Día das Letras Galegas, unha data que se celebra o próximo martes, 17 de maio. Segundo comunicou a propia compañía a través das redes, ofrece descontos a todos aqueles que teñan un nome galego.
«Porque toca defender o noso. Porque é unha boa oportunidade para festexalo!», indica a cadea de panaderías a través das redes sociais. Tamén explican que o obxectivo desta campaña é «defender o galego», algo que, eles mesmos recoñecen «require paciencia».
Innovadoras campañas con motivo do Nadal e o Entroido
Ademais da campaña de Tahona con motivo do Día das Letras Galegas, a súa aposta pola innovación tamén se puxo de manifesto en Nadal, cando apostou por proclamar as virtudes doutros produtos e o bo facer dalgunhas empresas da competencia, enxalzando os seus artigos. Elaborada pola axencia coruñesa Kindergarten, a campaña destacaba a calidade do roscón de Reis da confeitaría Glaccé ou os pasteis de Berna.
Uns meses despois, Tahona aproveitou o Entroido para disfrazarse «do que non é» e facer reflexionar sobre a importancia de apostar polas tradicións propias e evitar que se perda «aquilo que nos fai únicos». Con este obxectivo, a emblemática tenda de Tahona vestiuse durante uns días de The Supercool NY Bakery, unha cadea internacional de repostería industrial que podería estar en calquera cidade do mundo.
