Santiago estréase como sede do IX Encontro Nacional de Deseño (9ENAD)

Do 15 ao 17 de outubro reúnense no CGAC e no Museo do Pobo Galego os principais representantes do deseño de España

Os días 15, 16 e 17 de outubro, Santiago será a capital do IX Encontro Nacional de Deseño (9ENAD), un evento organizado pola Rede Española de Asociacións de Deseño (READ) e pola Asociación Galega de Deseño (DAG) que conta co patrocinio da Xunta de Galicia e coa colaboración do CGAC, do Museo do Polo Galego e World Design Capital Valencia 2022.

Este encontro buscar crear un espazo de intercambio de opinións e información entre expertos do sector e divulgar as tendencias relevantes no diferentes ámbitos do deseño. Nesta edición, baixo o tema “Identidade e Territorio”, os participantes poñerán en común o valor da cultura e a traza diferencial que esta representa, ademais doutros temas como a internacionalización, as necesidades das persoas ou o deseño sostible, inclusivo e feminista.

A asistencia ao IX Encontro Nacional de Deseño (9ENAD), é gratuíta previa inscrición

Un dos eixes fundamentais dos ENAD son as mesas de traballo, onde as persoas interesadas poden intervir e aportar ideas. Este ano traballarase con From Spain With Design (FSWD) un proxecto de READ para a proxección internacional do deseño español, Arquivo do Deseño, Proxectos Internacionais, Gráficas en Negro e Boas Prácticas. Ademais, haberá unha mesa pechada, a de Estratexia do Deseño.

Para asistir ás conferencias e ás mesas de traballo debe facerse a inscrición previa xa que as prazas son limitadas. Ademais, as conferencias serán retransmitidas en directo a través da canle de YouTube de READ.

Programación

O programa desta novena edición presenta dous días completos de actividade que se inician o venres 15 coa inauguración institucional e a presentación do “Estudo da economía do deseño en Galicia” de GAIN/DAG. A continuación, a presidenta de Experimentadesing, Guta Moura Guedes, impartirá a conferencia “Primeira Pedra”, un proxecto internacional que difunde o potencial da pedra portuguesa. Durante a mañá do venres tamén se celebra a mesa redonda “Territorio e identidade” coa participación de Xènia Viladàs e inaugúrase a exposición de From Spain With Design. Será durante a xornada da tarde o momento no que se concentre o desenvolvemento das seis mesas de traballo previstas.

Ao mesmo tempo inaugúrase unha exposición no CGAC con pezas de 130 participantes que poderá visitarse ata o 30 de decembro

O sábado 16 iníciase a xornada coa conferencia “La gráfica del Laboratorio de Formas. Historia y futuro” de Marcos Dopico, profesor de deseño na Facultade de Belas Artes de Vigo, e Natalia Crecente, profesora de deseño na EASD Ramón Falcón de Lugo.

A mesa redonda organizada para ese día ten como temática o “Deseño de políticas públicas. A contratación de servizos de deseño” na que participan Mariana Salgado, deseñadora de servicios no Ministerio de Interior de Finlandia; Ángel Martínez, presidente da ADCV; e Ignacio García Fenoll, subdirector xeral de Coordinación da Innovación do Ministerio de Ciencia e Innovación. Tamén será o momento para presentar as conclusións das mesas de traballo celebradas o día anterior.

A última hora da tarde, xa de forma máis distendida, celebrarase un Showroom de festivais e eventos de deseño en España e a presentación da WDC Valencia 2022 na sala Riquela, coa que se clausurará esta novena edición.

A xornada do domingo 17 de outubro será máis lúdica e está organizada unha visita ás instalacións de Sargadelos en Sada (A Coruña) e unha actividade con A2Velas de Betanzos.

Exposición “Identidade e Territorio”

Xunto co encontro de deseño, o día 15 de outubro tamén se inaugura a exposición “Identidade e Territorio” organizada por READ-From Spain With Design e que poderá visitarse ata o 30 de decembro no Centro de Arte Contemporáneo de Santiago de Compostela.

A exposición, que conta con 130 participantes, articúlase en cinco eixes temáticos: interseccións, identidade e territorio, internacionalización, sostibilidade e ficcións reais, e mostrará pezas e traballos seleccionados por un comité de profesionais de diferentes ámbitos do deseño.

Artículo anterior
comunicación interna

Nuevos tiempos para la comunicación interna

Siguiente artículo
Creatividade Galega

Creatividade Galega ensalza la creatividad en el medio exterior con su nueva campaña