Pontevedra será de novo a sede deste evento en 2022
MARÍA EIMIL
Máis de 300 persoas asistiron á terceira edición de Flúor, o Congreso Atlántico de Márketing Dixital, que acolleu a cidade de Pontevedra entre o xoves 7 e o venres 8 de outubro. Ademais, unhas 1.200 persoas seguiron a retransmisión das actividades que tiveron lugar no Auditorio Afundación. Tralo récord desta edición, os organizadores, o Clúster da Comunicación de Galicia e Markea, confirmaron que a cidade de Pontevedra será de novo a sede deste evento en 2022.
Un total de 15 conferencias, dúas mesas redondas e catro obradoiros celebráronse no marco de FLÚOR21, un evento que contou coa participación de directivos de empresas como Google, TikTok, Prestashop, Coca-Cola ou Movistar +, entre outros. A primeira xornada estivo centrada na estratexia de marca e os novos modelos de negocio, mentres que a segunda xornada puxo o foco no ecommerce.
A cidade de Pontevedra convertiuse durante dous días na capital do márketing dixital europeo
Relatores de primeiro nivel
A cidade de Pontevedra convertiuse durante dous días na capital do márketing dixital europeo, con expertos como Teba Lorenzo, brand partnerships lead da rede social Tik Tok; Carolina Fernández, account strategy lead de Google Shopping; ou Charo Orellana, communication associate director en Coca-Cola Europacific Partners.
O congreso Flúor foi inaugurado polo presidente do Clúster da Comunicación de Galicia, Xosé Luis Reza, e máis polo alcalde de Pontevedra, Miguel Anxo Fernández Lores. Durante a presentación, o primeiro deles fixo fincapé na importancia do convenio asinado coa Associação Portuguesa de Profissionais de Marketing (APPM), un acordo que, segundo explicou, “vai traer moitas alegrías, porque o país veciño ten moito que dicir no eido do márketing”.
Pola súa banda, o alcalde de Pontevedra, Miguel Anxo Fernández Lores, asegurou que o goberno local está a traballar para “acadar unha cidade na que a creatividade, a innovación e as novas tecnoloxías sexan fundamentais”.
O turismo, na nova edición de Flúor
Ademais das conferencias, a programación de Flúor incluíu unha serie de mesas redondas e unha delas xirou arredor do turismo e da aposta deste sector pola venda directa, a sostenibilidade ou das redes sociais. O director xeral de OCA Hotels, Ramón Braña, explicou a necesidade de innovar “nun sector que quedou obsoleto” e subliñou a importancia de respondelas demandas do cliente actual, que busca máis enchufes e unha boa conexión WIFI, no canto dun televisor xigante, un obxecto que hoxe en día pode ter calquera na súa casa. Xunto a el estiveron o director de estratexia de marca en Palladium Hotel Group, Iñaki Bau, e mailo director de Alda Hotels, Alberto Rodríguez Boo.
O congreso Flúor contou co apoio de patrocinadores como o Concello de Pontevedra, a Xunta de Galicia, a Deputación de Pontevedra, entidades e organizacións empresariais como Abanca, ICON y Avante Evolumedia, así como Dinahosting, Galicia Calidade, Redegal y Roi Scroll, xunto a colaboradores como Miraveo, Coca-Cola, Autocares Rías Baixas, Alda Hotels, entre outros.
