O obxectivo é rexistrar o maior número posible de voces para adestrar unha intelixencia artificial que entenda o galego falado
ROCÍO MOARES
Que a intelixencia artificial entenda o galego falado. Ese é o obxectivo do proxecto falAI, creado pola empresa tecnolóxica Balidea en colaboración coa Universidade de Vigo. Co fin de crear o maior dataset de voces en galego do mundo e poder adestrar ás intelixencias artificiais, Balidea e a UVigo lanzaron o reto falAI a través da web falai.balidea.com para rexistrar o maior número de voces posibles.
A emoción, fío condutor
Para dar visibilidade ao proxecto, a axencia Recados Carmen puxo en marcha unha campaña en diferentes frontes para chegar a todos os públicos. Así, lanzaron dúas pezas audiovisuais que se caracterizan pola súa emotividade, nas que Aurora Maestre, a protagonista de “Xoves de Comadres”, representa situacións nas que os asistentes baseados na IA poderían axudar ás persoas máis vulnerables.
Un reto con humor
O cómico e presentador Iván Müller ofrece nas redes a súa particular visión da relación coas intelixencias artificiais. Ademais, o proxecto xa contou coa colaboración de Esther Estévez e de Virtudes, a Repunante, o alter ego cómico da xornalista María Foscaldo.
Pero a campaña non só se difunde nas redes. Durante os primeiros días, enviáronse mensaxes explicativas a través de WhatsApp ou Telegram: pezas dun minuto que solicitaban o apoio de todos e alertaban do perigo para unha lingua de non estar presente na revolución tecnolóxica do futuro.
#a30frases
O proxecto continuará aberto ata finais de marzo. O obxectivo é acadar 300 horas e 360.000 gravacións con todos os trazos dialectais de Galicia. Ademais de gravar 30 frases coas que axudar a que medre o dataset, os participantes optan a premios como consolas de videoxogos ou experiencias de benestar.
Tras sete días de campaña xa se logrou o primeiro obxectivo: superar as 100 horas de gravacións. É máis, xa están nas 230 horas e seguen subindo, polo que agora a IA xa entende a retranca!