greenwashing

Prácticas de greenwashing nas marcas galegas

Algunhas marcas tentan subirse ao carro da sostibilidade a través da ecoimpostura ou greenwashing

O greenwashing toma terreo en Galicia, sendo unha práctica transversal a todos os sectores que non resulta allea a empresas nin a consumidores. Así o amosan os resultados dun estudo de opinión sobre a comunicación da sostibilidade nas marcas galegas realizado por Aporta Comunicación.

A través da ecoimpostura ou greenwashing, algunhas marcas tentan subirse ao carro da sostibilidade, esaxerando o seu compromiso ou amosando prácticas ambientais que realmente non levan a cabo mediante mensaxes publicitarias, campañas de marketing, comunicación ou imaxe de marca.

Tal é a súa presenza no mercado actual, que o último cribado de sitios web realizado pola Comisión Europea en xaneiro de 2021 perseguindo a fraude ambiental revela que o 42% das compañías europeas rastrexadas amosan mensaxes esaxeradas, enganosas ou directamente falsas.

Propósito ambiental

O propósito ambiental e as accións impulsadas para favorecer a sostibilidade non poden ser unha simple maquillaxe e deben formar parte da folla ruta de toda empresa ou organización responsable. Os datos obtidos na enquisa revelan que gran parte do tecido produtivo galego adoece dunha falta de estratexia que aborde a transición ecolóxica.

Só unha terceira parte das empresas de Galicia contan cunha política ambiental definida. Os aspectos que máis pesan na visión da empresa galega no plano ambiental son a prevención e a xestión de residuos nun 18% dos casos e o gasto enerxético, con máis dun 16%, segundo se desprende do estudo.

Só unha terceira parte das empresas de Galicia contan cunha política ambiental definida

Reforzar a comunicación

O marketing e a formación ambiental son elixidos por apenas o 5,5% das compañías, o que revela un punto débil á hora de construir un discurso corporativo cohesionado coa transformación ecolóxica que se aveciña. “É necesario reforzar a comunicación para que as empresas trasladen o seu compromiso de xeito correcto aos consumidores e que, á súa vez, estes poidan distinguir a sostibilidade do que é un lavado de cara que xoga sucio co planeta, apunta Pedro Tasende, director de Aporta.

O 60% dos empresarios manifestan que os aspectos ambientais non inflúen nas súas vendas, dado que consideran nun 46% dos casos que o que aprecia o consumidor circunscríbese exclusivamente ao prezo e o 12,4% ve nos atributos eco unha moda ou tendencia do momento.

Artículo anterior
Dépor

“Mucho vivido. Moito por vivir”: la nueva campaña de Imaxe creada para el Dépor

Siguiente artículo
Bululú

Bululú crea a campaña de lanzamento da Estrella del Camino