O encontro centrouse en como transformar erros en oportunidades e fomentou o intercambio de coñecemento no sector dixital
REDACCIÓN
O vicepresidente da Deputación da Coruña, Xosé Regueira, inaugurou este venres na Coruña a xornada profesional Erros x Aprendizaxes, un encontro organizado polo Clúster do Ecommerce Galego, no que empresas galegas e españolas do ámbito dixital comparten experiencias sobre os erros cometidos durante o seu proceso de crecemento e as aprendizaxes que lles permitiron avanzar.
O evento celebrouse en Palexco e reuniu a responsables de diferentes marcas que explicaron en primeira persoa como transformaron fallos empresariais en oportunidades de mellora e innovación.
Durante a súa intervención, Regueira destacou a importancia de espazos que promoven unha visión máis honesta do emprendemento e que rompen coa idea dun éxito empresarial sen dificultades. “Os erros non son fracasos, senón unha sorte de profesores caros”, afirmou, subliñando que o importante é saber aproveitalos para aprender máis rápido.
Regueira destacou a importancia de espazos que promoven unha visión máis honesta do emprendemento e que rompen coa idea dun éxito empresarial sen dificultades
O vicepresidente sinalou que encontros coma este permiten “desmitificar o éxito e pór sobre a mesa a verdade das campañas fracasadas”, lembrando que detrás de moitos proxectos empresariais que chegan a consolidarse adoita haber momentos difíciles que forman parte do proceso.
Así mesmo, puxo en valor o carácter colaborativo da xornada, que anima ás empresas participantes a compartir tanto os seus acertos como os seus fallos. Segundo explicou, esta dinámica contribúe a xerar aprendizaxe colectiva e a fortalecer o ecosistema empresarial a través do intercambio de experiencias.
Empresas participantes
A xornada reuniu a responsables de diversas compañías que expuxeron casos reais de erros empresariais e como estes se converteron en oportunidades de crecemento. Entre as firmas participantes atopáronse Par & Escala, Yo pongo el hielo, Rígido, Alda Hotels, Heimat Atlántica, Joyerías Calvo, Cultura Urbana, Dinahosting, Smartclick e o despacho Pintos & Salgado.
A xornada reuniu a responsables de diversas compañías que expuxeron casos reais de erros empresariais e como estes se converteron en oportunidades de crecemento
Ao longo do día, os participantes analizaron as estratexias, decisións e aprendizaxes derivadas de situacións complexas nos seus procesos de crecemento, co obxectivo de fomentar unha cultura empresarial baseada no intercambio de coñecemento e na mellora continua.
