Os erros e aprendizaxes en ecommerce reúnen a máis dun cento de profesionais na Coruña

Erros en ecommerce na Coruña

Sete profesionais analizaron diferentes prácticas vencelladas ao comercio electrónico durante a xornada celebrada en Palexco


MARÍA EIMIL


Máis dun cento de profesionais asistiron á xornada Erros x Aprendizaxes organizada polo Clúster do Ecommerce Galego en Palexco, na Coruña. O evento contou con sete ponencias de diferentes profesionais e puxo o foco na análise das prácticas vencelladas ao comercio electrónico.

Segundo explicou o presidente do Clúster do Ecommerce Galego, Xosé Luis Reza, o obxectivo do foro foi “compartir experiencias e aprender os uns dos outros”. Deste xeito, un total de sete profesionais compartiron prácticas pouco apropiadas que as súas empresas levaron a cabo nalgún momento determinado. “Este é un sector moi dinámico e a resposta da xente foi moi boa. Eles mesmos din que é moi difícil atopar profesionais que falen das súas propias debilidades”, apuntou Reza.

“É moi difícil atopar profesionais que falen das súas propias debilidades”, apuntou Xosé Luis Reza

Entender o produto

“Hai que cometer erros para aprender”. Foron as palabras do consultor en ecommerce, Nacho Comisaña, quen puxo exemplos reais dalgunhas das compañías ás que estivo vencellado ao longo da súa traxectoria profesional, entre elas El Corte Inglés, Hawkers ou RAW Sport Drink, empresa coa que traballa na actualidade.

“Teño que entender o meu produto, ata onde podo chegar e os canais máis axeitados para conseguilo”, explicou. Neste sentido, mentres que a marca española de lentes apostou por lanzar moitas campañas e promocións, e funcionou, RAW Sport Drink tivo que levar a cabo un cambio importante de estratexia para non morrer. Deste xeito, a bebida isotónica que naceu vencellada ao ámbito deportivo, xa que conta con inversores como os pilotos de F1 e MotoGP, Fernando Alonso e Aleix Espargaró, agora está a venderse tamén en grandes superficies comerciais.  

A formación, clave no mundo do ecommerce

Doutra banda, a consultora freelance de marketing e vendas, Marta Calvo, puxo o foco sobre a necesidade de formar ao equipo que se atopa detrás do ecommerce e á necesidade de coidar ao cliente para fidelizalo.

Con experiencia en marketplaces como coches.net, Marta Calvo falou da necesidade de contar coas ferramentas axeitadas e a formación necesaria para entender os datos que se extraen delas xa que, “en ocasións non aportan nada ao cliente”. Algo semellante aconteceu en coches.net, unha compañía que estaba a investir moitos recursos en captación e que tiña moi bos resultados, pero os seus clientes máis fieis non estaban contentos, xa que estaban a perder oportunidades. “Que algo estea a funcionar non significa que non teñas que cambialo”, sinalou, “o mercado evoluciona moi rápido”.

Atención ao cliente, creatividade e contacto co usuario

A directora de Relacións Públicas de Platanomelón, Luciana Simoncelli, puxo o foco sobre a necesidade de proporcionar un bo servizo de atención ao cliente en todo o proceso de compra, anticiparse ás rebaixas e ao Black Friday e a “tirar de creatividade cando as cousas non saen ben”. Neste sentido, explicou que dende esta empresa, líder en España en benestar íntimo, tamén apostan por buscar puntos de encontro co usuario, nos que coñecer aos seus clientes. “É importante desvirtualizar á xente”, subliña.

Ademais deles, a xornada Erros x Aprendizaxe contou coa participación do CEO de Miramar Cruises, Hugo Iglesias; coa cofundadora de Smart Agile, Carmen Salvador; coa responsable de Comunicación de Dinahosting, Adriana Freire; e coa ecommerce manager de Zapaterías Krack, Natalia Magán, que puxo o foco sobre o aprendizaxe, máis que os erros e trasladou unha serie de tips vencellados coa estratexia, cos costes e coa necesidade de pensar no cliente.

Artículo anterior
Canon Top Employer

Canon recibe la certificación Top Employer 2023

Siguiente artículo

Total Print Congress reúne al sector de la impresión en Santiago