“O mesmo mar fai cada día unha distinta praia” é a frase elixida este ano para ilustrar o valo que Pereira Productos del Mar ten nas súas instalacións da Avenida de Beiramar en Vigo. A poeta e filla de mariño mercante, Yolanda Castaño, é a autora desta mensaxe. Pereira seleccionou tres frases da escritora relacionadas co mar e convocou un concurso nas súas redes sociais para que os seguidores elixisen a que máis lles gustaba. “Faremos coma o calamar: sacaremos moitos brazos e, en tempos escuros, haberemos brillar” e “Escritoras e calamares: susténtanse na pluma e empregan a tinta con talento” foron as outras dúas frases que competiron coa gañadora.
“Esta fermosísima frase vai ser a protagonista do noso valo durante o vindeiro ano. Estabamos desexando presentar o novo deseño nun ano no que esperamos recuperar a tan ansiada normalidade. Con esta iniciativa, que levamos realizando dende case unha década, queremos pór en valor a importancia da literatura galega, tan nosa e tan importante no desenvolvemento da nosa cultura e da nosa sociedade”, explica Ruy Andrade, director de comunicación da firma.
Yolanda Castaño escribiu tres frases e os seguidores de Pereira nas redes sociais votaron pola que máis lles gustaba
“Queremos agradecer a Yolanda Castaño que quixera sumarse á familia de escritores galegos que durante os últimos anos participaron no noso valo como é o caso de Ledicia Costas e Domingo Villar”, engade Ruy Andrade.
O acto de presentación do valo tivo lugar o luns 28 de xuño a bordo do barco da Armadora Pereira “Argos Pereira” dende o que se podía ler a frase e o deseño do valo deste ano, mentres Yolanda Castaño lía aos asistentes un dos seus últimos poemas. O acto contou tamén cos gañadores do concurso activado nas redes sociais para seleccionar a frase, así como co responsable da empresa.
Dez anos de poesía
“O mesmo mar fai cada día unha distinta praia” toma o relevo a “Podo temer a morte, pero non quero ter medo a estar vivo” (2020) do libro “O último barco” do escritor vigués Domingo Villar e “O tempo, o sol e o mar engurraran o rostro do mariñeiro e cuartearan a súa pel como terra seca” (2019) da obra “A praia dos afogados” tamén do escritor vigués.
Un referente
Yolanda Castaño é poeta, filóloga, tradutora, videocreadora e unha activa e premiada xestora cultural coa súa propia Residencia para Escritores na Coruña. Dende 2009 dirixe obradoiros literarios, obradoiros internacionais de tradución poética, festivais e ciclos mensuais de poesía sempre con autores galegos e internacionais.
