O Museo Gaiás da Cidade da Cultura acolle o Galiverso, un espazo que difunde o patrimonio artístico e cultural de Galicia a través da realidade virtual
REDACCIÓN
A realidade virtual ten un enorme potencial como un vehículo comunicativo sen apenas barreiras, e mesmo pode axudar a redescubrir o patrimonio material e inmaterial de Galicia. Esta é a idea detrás de O Galiverso empeza aquí, unha iniciativa tecnolóxica, cultural e educativa da Xunta para poñer en valor o patrimonio artístico e cultural da comunidade a través do uso das tecnoloxías inmersivas.
Este novo espazo ten lugar no Museo Centro Gaiás, na Cidade da Cultura de Santiago de Compostela, e contará con 12 experiencias diferentes de realidade virtual onde os participantes poderán vivir o Galiverso: monumentos, espazos naturais e sitios de gran valor cultural, histórico e turístico das catro provincias galegas, que poden visitarse mediante uns lentes de realidade virtual e recreacións de imaxe e vídeo de gran detalle, sen saír do Museo Centro Gaiás.
No acto de presentación estiveron presentes o conselleiro de Cultura, Educación, FP e Universidades, Román Rodríguez; o director xeral de Cultura, Anxo Lorenzo, e a directora xerente da Fundación Cidade da Cultura, Ana Isabel Vázquez.
A accesibilidade é tamén outro dos puntos fortes desta instalación, xa que para gozar das experiencias non é necesario, por exemplo, subir os máis de 230 chanzos ata a lanterna da Torre de Hércules nin desprazarse ata as montañas dos Ancares para entrar nas pallozas que se conservan no Cebreiro.
O Galiverso é tamén unha porta aberta ao futuro Centro de Artes Dixitais de Galicia que acollerá o Gaiás, un centro pioneiro en España que permitirá ampliar os modos nos que o público se relaciona co patrimonio e impulsar o desenvolvemento de actividades innovadoras de apoio á creación dixital nas industrias culturais e creativas.
Un Galiverso aberto, libre e gratuíto
As persoas que visiten o Museo Centro Gaiás poderán entrar no Galiverso de maneira libre e gratuíta. A sala dispón de tres postos con cadanseu equipo de realidade virtual, que poden operar á vez, aínda que a experiencia de cada visitante será individual. Cada sesión dura uns 20 minutos, durante os cales é posible vivir unha ou varias das doce experiencias que se ofrecen.
Un mapa virtual de Galicia funciona a modo de menú desde o cal se pode acceder a cada unha delas e seleccionar o idioma —galego, castelán ou inglés— dos textos e audios explicativos que as acompañan.
A accesibilidade é tamén outro dos puntos fortes desta instalación
Pódese contemplar o solpor en Fisterra, as vistas da Coruña desde o cumio da Torre de Hércules ou o canón do Sil desde as alturas. Tamén internarse na cripta do Apóstolo en Santiago de Compostela, nos mosteiros de Santa María a Real de Oseira e de Santo Estevo de Ribas de Sil, na torre de Xiá en San Paio de Narla, no templo romano de Santa Baia de Bóveda ou nunha palloza no Cebreiro, e percorrer a ponte romana de Ourense, a muralla de Lugo ou os tellados da Catedral de Tui.
Máis experiencias e máis Galiversos no futuro
O Galiverso expandirase no futuro incorporando novas experiencias de realidade virtual vinculadas non só ao patrimonio e ao turismo, senón á ciencia e á experimentación. Así, poderemos somerxernos baixo a auga para explorar os tesouros naturais e históricos das nosas costas, ou ascender ata o espazo para descubrir Galicia desde outra perspectiva. A Xunta ten previsto igualmente crear máis puntos de entrada ao Galiverso en bibliotecas, museos de titularidade autonómica, e nos Polos Creativos dos centros de ensino.
No Museo Centro Gaiás poderá visitarse de martes a domingo en horario de tarde de 16.00 a 20.00 horas, así como sábados, domingos e festivos (excepto luns), tamén de 11.00 a 14.30 horas.
