A nova directiva aposta por reforzar a estrutura da entidade, ampliar a súa base social e impulsar proxectos que melloren a competitividade do sector en Galicia
REDACCIÓN
O Clúster da Comunicación de Galicia inicia unha nova etapa tras a renovación da súa xunta directiva, que estará encabezada por Marta Ferro, directora xeral de Closet. O novo equipo afronta o mandato 2026-2029 coa intención de reforzar a entidade, ampliar a súa base social e consolidala como un axente de referencia para o conxunto do sector da comunicación galego.
A nova presidencia aposta por unha transformación da organización que lle permita gañar capacidade de acción e ofrecer un maior apoio ás empresas e profesionais que integran a cadea de valor da comunicación en Galicia.
O Clúster da Comunicación de Galicia inicia unha nova etapa tras a renovación da súa xunta directiva, que estará encabezada por Marta Ferro
“Propoñemos unha evolución cara a un modelo máis executivo, máis transversal e con maior capacidade de acción”, sinala Marta Ferro, que fixa como obxectivos do proxecto que lidera ampliar a base social, escoitar as necesidades do sector, impulsar proxectos compartidos e dotar o Clúster dunha estrutura profesional que permita captar financiamento, xerar alianzas e ofrecer servizos de valor real ás empresas e profesionais que forman parte do sector da comunicación.
Captación de novos socios e xeración de alianzas
Entre as prioridades definidas para os próximos anos figuran a captación de novos socios, o establecemento de alianzas estratéxicas, o fortalecemento da estrutura interna da entidade e a posta en marcha de iniciativas orientadas a mellorar a competitividade e a visibilidade do sector.
A nova xunta directiva executiva estará formada por Marta Ferro como presidenta; Domingo Torrón, director xeral de Reclam, como vicepresidente; Daniel Bembibre, socio director de Costa, como secretario; e Fátima Carmena, CEO de Nasas, como tesoureira.
Entre as prioridades definidas para os próximos anos figuran a captación de novos socios e o establecemento de alianzas estratéxicas
O órgano complétase coa incorporación como vogais de Judit Cabana, CEO de FEMÜR Project; Daniel Rodríguez, fundador e CEO de Imprimeverde; David Pequeño, CEO de ingenyus*; e Chechu Pérez Seoane, profesional independente, docente universitario e doutor en Ciencias da Comunicación.
Segundo explican desde a entidade, a composición da nova directiva busca representar distintos ámbitos da comunicación, desde a estratexia e a creatividade ata a innovación, a impresión, o marketing dixital, a transferencia de coñecemento e o ámbito académico.
Un plan estratéxico con tres eixos
O plan estratéxico para o período 2026-2029, presentado na Asemblea Xeral celebrada en Santiago de Compostela o pasado 29 de maio, estrutúrase arredor de tres grandes eixos: crecer, planificar e executar. A intención é converter as propostas en proxectos concretos relacionados co financiamento, a formación, a innovación, a internacionalización e a promoción do sector.
“Galicia conta cun sector da comunicación con talento, creatividade e capacidade de impacto; agora necesitamos unha estrutura común para proxectar todo ese potencial con máis ambición”, subliña Ferro.
O plan estratéxico para o período 2026-2029 estrutúrase arredor de tres grandes eixos: crecer, planificar e executar
A nova presidenta afronta esta etapa “cunha gran responsabilidade, ilusión e unha profunda confianza no valor do sector para impulsar Galicia”. Neste sentido, subliña que “a comunicación non é un elemento accesorio: é estratexia, reputación, creatividade, industria, innovación e tamén territorio”.
