O workshop desenvolverase no marco de Beerfing este xoves 31 de marzo
FELIPE VIEIRA
Este xoves 31 de marzo, o Cluster da Comunicación de Galicia xunto a Creatividade Galega organizan no marco de Beerfing o workshop “Tendencias & Futuro”, un obradoiro dinámico e participativo onde se presentarán unha relación de tendencias, casos, novas, testemuñas e datos cuxa misión é axudar aos participantes a estar ó día sobre unha serie de asuntos de interese relacionados cos seus ámbitos de actividade.
O workshop enmárcase dentro da programación de Beerfing e pretende axudar ás empresas e ao persoal do sector a mellorar a súa propia estratexia interna á hora de deseñar ou prestar servizos máis innovadores grazas a un coñecemento máis actualizado sobre diferentes temáticas.
O obradoiro, no que se amosarán máis de 30 tendencias ou casos, estará impartido pola consultora C4E Innovación, Marketing e Comunicación, co patrocinio de Estrella Galicia.
Tres grupos
O workshop divídese en tres grandes grupos divulgativos tendencias, casos e news, people & data. No ámbito das tendencias abordaranse as seguintes cuestións: O metaverso, moda ou realidade?; Chega a web3; Todos a fabricar chips; A cultura da cancelación; Canto é demasiado grande?; A ameaza dos socios activistas; Coches voadores?; Os perdedores post-pandemia; A loucura dos NFTs; Liderado para tempos cambiantes e Que pasou coa semana de catro días?.
Os casos incluirán temáticas como A guerra do gaming; Os maiores revolucionan a banca; De profesión, verificador de noticias; Noruega, a casa da mobilidade eléctrica; Meta, uns meses despois; Joe Rogan & Spotify; CES 2022-O primeiro show post-pandemia; A carne no banquillo; Os Iphone revolucionan os pagamentos, de novo; O caso Pokimane; Toyama e o futuro das cidades; A era da reutilización e O right-to-repair faise maior.
Na quenda de news, people & data analizaranse os Robots cotiáns; O tractor autónomo de John Deere; Cidades en 15 minutos; Shadow Pandemics Imax to Hollywood; Máis, máis, máis e máis rápido; Na busca da atención perdida; Lanova-Mobles a medida, reformados e Miss Excel-Unha Tiktoker de folla de cálculo.
Entrega dun informe
Tras estas sesións de actualización e renovación, a cada asistente enviaráselle un informe de máis de 200 páxinas, detallando e ampliando o contido divulgado na xornada.
Este informe incluirá un resumo interpretados dos casos e tendencias más relevantes; unha revisión das principais innovacións do trimestre en comunicación, publicidade, tecnoloxía, creatividade, márketing e entretemento e suporá unha boa ferramenta para incentivar o diálogo no sector, en prol da discusión e o traballo arredor de novas tendencias e innovacións.
Trátase dunha actividade impulsada polo Clúster da Comunicación de Galicia xunto a Creatividade Galega
Os socios do noso Clúster poden asistir gratuitamente a este workshop que se desenvolverá entre as 16.00 e as 19.30 horas do 31 de marzo no Centro Obra Social Abanca emprazado na Praza de Cervantes, en Santiago de Compostela. A actividade enmárcase dentro do Beerfing “Encontros de Creatividade & Cervexa”.
O evento Beerfing é posible grazas ao patrocinio de Estrella Galicia e á colaboración de entidades como Abanca, Reclam, Cactus Digital ou a Facultade de Ciencias Sociais e da Comunicación da Universidade de Vigo, entre outras.
