Para participar nesta nova edición do Premio Galicia de Fotografía Contemporánea, pódense presentar propostas dende o 7 de setembro ata o 23 de outubro
REDACCIÓN
Un ano máis, grazas ao impulso da asociación Outono Fotográfico, tivo lugar a presentación a décima convocatoria do Premio Galicia de Fotografía Contemporánea, que conta co apoio da Xunta de Galicia.
Durante o acto de presentación no Centro Galego de Arte Contemporáneo (CGAC), o director xeral de Cultura, Anxo M. Lorenzo, destacou a importancia desta iniciativa que contribúe a situar Galicia no mapa da creación artística e poñer en valor a gran calidade do traballo que se fai na nosa Comunidade en clave contemporánea.
A exposición inaugurarase entre os meses de decembro de 2022 e xaneiro de 2023 en Lugo e itinerará durante dous anos polo resto de Galicia nas salas de Afundación
Nesta liña, o representate da Consellería de Cultura, Educación, FP e Universidade resaltou a capacidade do galardón para “atraer artistas de todas partes do mundo convertendo a nosa terra nun espazo de intercambio artístico no que o talento galego convive con creadores de diferentes partes do mundo”.
Unha exposición intinerante
O Premio Galicia de Fotografía Contemporánea conta co patrocinio da Xunta de Galicia e a Deputación de Lugo cun único premio que consiste na produción dunha exposición itinerante e unha publicación dun libro.
A exposición inaugurarase entre os meses de decembro de 2022 e xaneiro de 2023 en Lugo e itinerará durante dous anos polo resto de Galicia nas salas de Afundación. Ademais, publicarase un libro que formará parte da serie Premio Galicia de Fotografía Contemporánea da colección OF e que se distribuirá nas librarías.
Linguaxe visual e contemporaneidade
Os interesados en participar deberán presentar o seu proxecto desde o 7 de setembro ata o 23 de outubro. Deben ser traballos realizados entre outubro de 2012 e outubro deste ano que non foran subvencionados ou becados na súa totalidade anteriormente noutro certame, nin editado na súa totalidade en calquera soporte, con enteira liberdade respecto ao tema e á técnica.
Entre os proxectos recibidos, o xurado seleccionará tres proxectos finalistas atendendo á linguaxe visual do autor, á calidade fotográfica e á contemporaneidade. Os nomes dos finalistas publicaranse o 2 de novembro de 2022 na páxina web de Outono Fotográfico e e nas redes sociais da Asociación.
