O terceiro workshop do ciclo ‘Sustentabilidade e circularidade dos materiais’, organizado pola Materioteca de Galicia, terá lugar este xoves 6 de outubro en forma presencial e online
REDACCIÓN
O ecodeseño e a sustentabilidade serán os protagonistas do novo workshop organizado pola Xunta de Galicia a través da Axencia Galega de Innovación e a súa Materioteca de Galicia. Baixo o nome de ‘Materiais e ecodeseño‘, este workshop terá lugar este xoves 6 de outubro, de 10:00 h a 14:00 h. O encontro terá formato presencial no CIS de Tecnoloxía e Deseño de Ferrol e a súa parte expositiva poderá seguirse online.
O evento está orientado a profesionais do deseño, da enxeñería e da construción con interese pola aplicación de novos materiais en procesos innovadores. Este materiais sostibles presentan novas texturas que, a través
do ecodeseño, permiten innovadoras propostas estéticas, á vez que, polas súas características e procesos, conseguen minimizar o impacto ambiental dos produtos.
Programa da xornada
O workshop comezará coa presentación de María José Mariño, da Axencia Galega da Innovación, que dará a benvida ós asistentes e inaugurará este workshop, o terceiro do ciclo ‘Sustentabilidade e circularidade dos materiais’.
A primeira parte da xornada terá como protagonistas a Noemí Cortizas, experta en deseño CMF (acrónimo en inglés de cor, materiais e acabados); que presentará diversos casos de aplicación deste tipo de materiais nos que, sen prexudicar a experiencia do usuario, se prioriza o respecto ás normativas europeas e os seus criterios de sostibilidade, á vez que se melloran o produto e o envase dunha marca.
A continuación, dúas empresas galegas expoñerán as súas experiencias co ecodeseño para a creación de novos produtos a partir de madeiras máis sostibles e de procedencia local: Mobalco (mobiliario de cociña) e Timbersoul by Cándido Hermida (aplicacións arquitectónicas de novos soportes estruturais de madeira). Despois destas intervencións, será o momento da pausa café, programada para as 11:40 h.
O encontro terá formato presencial no CIS de Tecnoloxía e Deseño de Ferrol e a súa parte expositiva poderá seguirse online
Durante a segunda parte do workshop, que terá carácter exclusivamente presencial, os expertos da empresa Materially dinamizarán un taller práctico e interactivo no que se analizará unha selección de materiais sostibles e as súas oportunidades de aplicación mediante o ecodeseño. Estes materiais forman parte dun estudo estratéxico que será presentado durante o taller e publicado na web da Materioteca de Galicia.
A xornada pechará cun aperitivo-networking ás 14:00 h. Para realizar a inscripción (xa sexa presencial ou online), debe cubrirse un formulario na páxina da Materioteca, de maneira totalmente gratuíta.
