Será un evento único para celebrar os faros como símbolos do patrimonio histórico, social e cultural da comunidade
REDACCIÓN
O 1 de novembro, a cidade da Coruña celebrará o Mercado dos Faros, un evento que ten como obxectivo poñer en valor os faros de Galicia, elementos emblemáticos do patrimonio histórico, social e cultural da comunidade.
A cita terá lugar no Hotel NH Collection Finisterre, onde os asistentes poderán desfrutar de múltiples actividades, expositores e iniciativas culturais, dende as 12:00 ata as 21:00 horas.
Esta iniciativa, que parte de Océano Azul, é de especial transcendencia, xa que Galicia conta cun total de 44 faros, entre os que se inclúen algúns tan icónicos como a Torre de Hércules, Patrimonio da Humanidade, e outros puntos clave como as Cíes, Corrubedo ou o Semáforo de Fisterra.
Galicia conta cun total de 44 faros, entre os que se inclúen algúns tan icónicos como a Torre de Hércules, Patrimonio da Humanidade
Non obstante, e a pesar da súa relevancia, nunca se lles deu a visibilidade que merecen, especialmente ao servizo que estes faros levan prestando durante séculos ás comunidades costeiras, protexendo e orientando aos navegantes.
Revalorizar un emblema de Galicia
Por iso, o Mercado dos Faros nace coa intención de poñer en valor estes monumentos e a súa relación co mar, integrando no evento marcas e produtores galegos que compartan valores de tradición e sostibilidade, co obxectivo de destacar a súa conexión coa cultura mariñeira da rexión.
Ademais dos postos de artesanía, arte, alimentación e complementos, o mercado contará cunha actividade destacada: un certame de pintura rápida, no que os participantes deberán plasmar a súa visión do faro da Torre de Hércules.
O mercado contará cunha actividade destacada: un certame de pintura rápida
As obras presentadas serán expostas á tarde e someteranse á votación dun xurado profesional e tamén ao voto popular. Os mellores artistas recibirán premios en metálico e tarxetas regalo de Jasp Art.
Visitas guiadas á Torre de Hércules
Pero a actividade non se limitará só ao mercado. Haberá tamén música en directo, a posibilidade de coñecer de primeira man os produtos galegos e, como actividade destacada, paseos guiados ata a Torre de Hércules. Estas rutas permitirán aos asistentes explorar máis de cerca a contorna do faro e coñecer mellor a súa historia e significación. O aforo para as rutas será limitado a 20 persoas, e os participantes recibirán unha entrada para visitar a Torre de Hércules.
Estas rutas permitirán aos asistentes explorar máis de cerca a contorna do faro e coñecer mellor a súa historia e significación
O evento, que busca promover o turismo e a cultura galega, conta co apoio da Xunta de Galicia; Turismo de Galicia; a Deputación da Coruña coa “Paisaxe que Sabe”; o Mercado da Deputación da Coruña; Turismo da Coruña; e Cuarenta & Cuatro Faros. Todas estas institucións colaboran na difusión e organización desta xornada.
Así pois, con este mercado, A Coruña quere destacar a riqueza do seu patrimonio marítimo e, en particular, a figura dos faros como símbolos de protección, historia e identidade para a comunidade.
Baixo o lema “A mirada da Torre”, o Mercado dos Faros será unha oportunidade para achegarse á historia, a arte e a tradición galega nun evento único que, sen dúbida, será un referente cultural na cidade.
